കരിവളക്കാലം..

കണ്മഷി,

കരിവള,

ചാന്തു പൊട്ട്...

തമിഴത്തി യശോദ ഭാണ്ഡവും പെട്ടിയുമായി,

'വളാ.....വളാ ...'എന്ന് വിളിച്ചു നടന്ന
എന്‍റെ ഗ്രാമവഴികള്‍ 

മറവിയില്‍ പൂണ്ടു കിടപ്പായി..

പെണ്‍കിടാങ്ങള്‍  കൊതിയോടെ കാത്തിരുന്ന വിളികള്‍..

സ്കൈലാബ് വള, പളുങ്ക് വള,
സ്പ്രിങ്ങ് വള ,

കൊമ്പ് വള, മിന്നു വള...

കുമ്മായമടര്‍ന്ന ചുവരിലെ പൊത്തില്‍     

സൂക്ഷിച്ചുവെച്ച പച്ചക്കുപ്പിവളകള്‍

അലക്ക്കല്ലില്‍ ചിതറിപ്പോകുന്ന
ചുമന്ന കുപ്പിവളകള്‍.

പുഴവക്കത്തെ കുതൂഹലങ്ങള്‍ക്ക്‌ മീതെ

വര്‍ണം പൊഴിക്കുന്ന തത്തപ്പച്ചകള്‍..
സോപ്പ് പതയില്‍ നുരയുന്ന വര്‍ണരാജികള്‍....
പിന്നെയും പിന്നെയും വാങ്ങി,

ഇരു കൈകളും നിറയുന്ന വര്‍ണമേളങ്ങള്‍ 



ഇടവഴിയില്‍ കാത്തുനില്‍ക്കുന്നവന്‍റെ  കയ്യില്‍
പ്രണയം, ഒരു പൊതി വള.
കരിവളക്കാലം...

അകന്നകന്നു പോയ ഒരു  

കരിവളക്കാലം..